تحليلات .. وحوارات .. ومناقشات .. عن مواضيع الساعة .. من وجهة نظر البعض .. وهناك وجهة نظر معاكس آخر ..
الدكتور / عبدالعزيز المفتي
((نتمنى من الاحتلال الروسي لأوكرانيا أن لا يخطأ (أخطاء) أمريكا عند احتلالها الدول)) ج59
- بما أنه الاحتلال الروسي لأوكرانيا واقع لا محالة نتمنى من الحكومة الروسية أن لا تخطأ الأخطاء الأمريكية الفادحة التي ارتكبتها باحتلال الدول الصغيرة، وأن (روسيا) ما تجيب لأوكرانيا إلا ولد الأصول والشبعانين من كاعهم مو تروح تجيب وين ماكو واحد امه وتسلمه سلطة بلد بحجم أوكرانيا.
- اذا روسيا رادت تشكل حكومة ووزارة جديدة لأوكرانيا من هسه خلي تختار ناس أكفاء وناس اختصاص ادارة وقيادة مو تجيب مطيرجية وبياعة سبح بالسيدة (انوشكا) او حملدارية او بياعة كبة وتسلمهم الرئاسة وهمه هوش الله بأرض الله.
- ولازم وحتماً روسيا تدقق القيود الجنائية لأي شخص تريد تسلمه منصب حتى ما تكرر الأخطاء الأمريكية اللي سلمت السلطة لهواي دودكية وحرامية وقطاع طرق.
- واذا رادت تسلم سلطة لواحد تسلمه على اساس كفائته وخبراته ورصانة شهادته العلمية مو تنطي المنصب لواحد اوكراني كل مؤهلاته انه ابن البطريارك الفلاني او ابن اخت الكاردينال العلاني او تنطيه السلطة لانه ابوة كان معدوم بزمن بريجينيف.
- وايضاً لازم تنتبه للشهادات العلمية للأشخاص الي تريد تسلمهم منصب وتتأكد من صحة صدورها.
- واهم شي روسيا لازم تكرص اذان جوارين اوكرانيا وما تسمح لأي دولة إقليمية تشيل رأسها وتتدخل بشؤونها ولأي سبب من الأسباب ولا حدود جغرافية ولا علاقات تاريخية.
- ولازم روسيا تنتبه وتخلي السلطة بيد شخص واحد، لأن الشعب الاوكراني يحتاجله الف سنة حتى يعرف يختار الشخص المناسب الي يستحق يمثله، هاي غير انه الاوكرانيين من الله خلقهم الديمقراطية ما تأكل وياهم وما يمشون الا بالسيف والنار.
- ودير بال روسيا تحل الجيش الأوكراني او تحل الاجهزة الأمنية لأن الف نغل راح يطلع يسوي نفسه كان معارض وكان 24 ساعة مدوخ الامن وراه هاي غير انه حل الجيش يعني ظهور الف فصيل مسلح كلها بالظاهر تنادي بالوطن وترفع شعاره وبالسر تبوكه وتطعنهم بظهره.
- اكو نقطة مهمة جداً على روسيا ان تنتبهلها وما تنخدع بيها وهي انه اول ما راح تدخل لأوكرانيا راح تلكه مئات شيوخ العشائر الاوكرانية بانتظارهم اضافة لعشرات الالاف من الاوكرانيين اللوكية يهتفون باسم بوتين ويشكروه على تحريرهم من الطاغية الهدام (فولوديمير زيلينسكي).
- اخيراً على روسيا ان تنتبه زين لكل اعوانها وسماسرتها اللي جابتهم وياهه وسوتهم اوادم لان التاريخ يكول انه اي واحد اجه ويه محتل وما استفاد منهم مباشرة يعض ايدهم ويروح يصير ذيل لأي دولة تحتضنه ووره كم سنة يرفع راية الجهاد والمقاومة.
الدكتور عبدالعزيز المفتي